бұйрық

(Приказ)

бағыныштылардың орындауы міндетті бастықтың жазбаша немесе ауызша бұйрығы, әскери басқарудың негізгі актісі. Б. арқылы бастықтың еркі құқықтық сипатқа ие болады. Бастықтың Б-ы бағыныштылар үшін заң болып табылады. Б-пен әскерлерге ұрыстық тапсырмалар жеткізіледі. ҚР Қорғаныс министрінің Б-мен мемлекеттік өкіметтің жоғарғы органдарының Қарулы Күштерге қатысты заңдық актілері жарияланады, сонымен қатар жарлықтық құжаттар күшіне енгізіледі. Б. арқылы әскерлердің (күштердің), мекемелердің, әскери-оқу орындарының тіршілігі мен күнделікті қызметтері белгіленеді. ҚР Қарулы Күштерінде әскери бөлімдерінде тәуліктік наряд құрамын тағайындау, бөлімнің жеке құрамын тізімге тіркеу және есептен шығару, қызметке тағайындау, марапаттау және т.б. туралы саптық бөлім бойынша күн сайын жазбаша бұйрықтар шығарылады. Бұдан басқа, тыл, техникалық бөлім, ракеталық-артиллериялық қару-жарақ қызметтері және т. б. мәселелер бойынша Б-тар шығарылады. Атаулы күндер мен кейбір Қарулы Күштер түрлері мен әскер тектері үшін бекітілген мерекелер құрметіне мерекелік бұйрықтар шығарылады. Б-тарды дайындау реті, есепке алынуы, жіберілуі және сақталуы тиісті тәлімдемелермен және басшылықтармен анықталады. ҚР Қарулы Күштерінде әскери бөлімдер мен құрамалар командирлері, мекемелер мен әскери-оқу орындарының бастықтары, гарнизон бастықтары, әскери округ әскерлерінің қолбасшылары жазбаша Б. беруге құқықтары бар. Бұдан басқа ҚР Қорғаныс министрінің бұйрығымен және әскери басқару органдары туралы тиісті ережелерге сәйкес басқа да лаузымдық тұлғаларға атқаратын қызметтік міндеттерінің шеңбері шегінде жазбаша Б. беру құқығы берілуі мүмкін. Бөлімшелердің коман-дирлері Б-ты тек қана ауызша береді.